ព្យុងយ៉ាង ៖ ប្រទេសសិង្ហបុរីបានជំរុញឱ្យកូរ៉េខាងជើងចូលរួមកិច្ចសន្ទនាក្នុងតំបន់ និងរក្សាបណ្តាញទំនាក់ទំនងឱ្យបើកចំហ ក្នុងគ្រាដែលពិភពលោកកំពុងជួបប្រទះនូវភាពមិនប្រាកដប្រជា និងការប្រែប្រួលភូមិសាស្ត្រនយោបាយយ៉ាងខ្លាំង ។

រដ្ឋមន្ត្រីការបរទេសសិង្ហបុរី លោក Vivian Balakrishnan បានជំរុញបែបនេះ ក្នុងអំឡុងទស្សនកិច្ចការងាររយៈពេលពីរថ្ងៃ នៅរដ្ឋធានីព្យុងយ៉ាង ចាប់ពីថ្ងៃទី២៦ ដល់២៧ ខែឧសភា តបតាមការអញ្ជើញរបស់ប្រមុខការទូតកូរ៉េខាងជើង លោកស្រី Choe Son Hui ។

បើតាមសេចក្តីថ្លែងការណ៍របស់ក្រសួងការបរទេសសិង្ហបុរី, លោក Balakrishnan បានលើកឡើងថា ស្ថានភាពអន្តរជាតិបច្ចុប្បន្ន មានភាពគ្រោះថ្នាក់ និងប្រែប្រួលខ្លាំង ដូច្នេះហើយ ការពិគ្រោះយោបល់ និងការកសាងទំនុកចិត្តកាន់តែមានសារៈសំខាន់ ។

ទន្ទឹមគ្នា ប្រមុខការទូតទាំងពីរក៏បានធ្វើការផ្លាស់ប្តូរមតិយោបល់គ្នា ជុំវិញបញ្ហាសន្តិសុខក្នុងតំបន់ និងស្ថានការវិវត្តចុងក្រោយនៅលើឧបទ្វីបកូរ៉េ ។

ឆ្លៀតឱកាសនោះ ភាគីទាំងពីរបានរំលឹកឡើងវិញនូវទំនាក់ទំនងមិត្តភាពយូរអង្វែង និងបានអបអរសាទរខួបលើកទី៥០ នៃទំនាក់ទំនងការទូតរវាងសិង្ហបុរី-កូរ៉េខាងជើង ។

ស្របពេលជាមួយគ្នានេះ លោក Balakrishnan ក៏បានអញ្ជើញលោកស្រី Hui ចូលរួមក្នុងវេទិកាតំបន់អាស៊ាន ហៅកាត់ ARF ដែលកូរ៉េខាងជើងជាសមាជិកស្រាប់ផងដែរ ។

បើតាម Straits Times, បេសកកម្មការទូតនេះ ធ្វើឡើងចំពេលដែលកូរ៉េខាងជើងទើបតែបានបាញ់សាកល្បងមីស៊ីលបំពាក់ AI និងរ៉ុក្តែតជំនាន់ថ្មី ដើម្បីត្រៀមបញ្ចេញក្នុងសង្គ្រាមសម័យទំនើប ។

បន្ទាប់ពីបញ្ចប់ទស្សនកិច្ចនៅកូរ៉េខាងជើង ប្រមុខការទូតសិង្ហបុរីបានបន្តដំណើរទស្សនកិច្ចទៅកាន់រដ្ឋធានីសេអ៊ូល ប្រទេសកូរ៉េខាងត្បូង ដើម្បីជួបពិភាក្សាការងារជាមួយរដ្ឋមន្រ្តីការបរទេសកូរ៉េខាងត្បូង លោក Cho Hyun ៕

ប្រភព ៖ The Straits Times ប្រែសម្រួល ៖ ឈឹម ទីណា