ហាណូយ ៖ ប្រទេសវៀតណាមបានបញ្ចេញរថក្រោះផលិតក្នុងស្រុកដំបូងបង្អស់របស់ខ្លួន ដែលរចនាឡើងបំពាក់ដោយប្រព័ន្ធប្រយុទ្ធទំនើបៗ ជាពិសេសអាចបើកកាត់ទឹក និងដីគោកបានយ៉ាងងាយស្រួល ។

រថក្រោះនេះមានឈ្មោះ T-1 គឺជារថក្រោះធុនស្រាល ដែលស្ថិតក្រោមការអភិវឌ្ឍន៍ដោយរោងចក្រការពារជាតិ Z125 នៃក្រសួងការពារជាតិវៀតណាម ។ វាបង្កើតឡើងក្នុងគោលបំណងកាត់បន្ថយការបញ្ជាទិញរថក្រោះថ្មីៗពីបរទេស ។

ជាពិសេស វានឹងយកមកជំនួសរថក្រោះចាស់ៗពីសម័យសូវៀត PT-76 ក៏ដូចជារថក្រោះចិន Type 63 ដែលវៀតណាមដាក់ចូលបម្រើសេវាកម្មក្នុងជួរកងទ័ព ចាប់តាំងពីឆ្នាំ ១៩៧០ មក ។

បើតាម Asian military review, រថក្រោះ T-1 ដំណើរការដោយថាមពលម៉ាស៊ូត មានទម្ងន់ជាង ១៨ តោន និងប្រើប្រាស់កម្លាំងម៉ាស៊ីន ៤៧០ សេសេ ដែលធ្វើឱ្យវាមានសមត្ថភាពរត់ក្នុងចម្ងាយប្រហែល ៨០ គីឡូម៉ែត្រក្នុងមួយម៉ោង ។

រថក្រោះដំបូងបង្អស់របស់វៀតណាមនេះ បំពាក់កាណុងកាំភ្លើងមេទំហំ ៧៦ មីលីម៉ែត្រ និងកាំភ្លើងយន្តបញ្ជាពីចម្ងាយទំហំ ១២.៧ មីលីម៉ែត្រ ។ វាមានកង់ចំនួន ៧គ្រាប់នៅសងខាង ហើយត្រូវបានបំពាក់ដោយប្រព័ន្ធគ្រប់គ្រងការបាញ់ និងប្រព័ន្ធបញ្ចូលគ្រាប់ដោយស្វ័យប្រវត្តិ ។

ចំណែកមុខងារស្នូលរបស់រថក្រោះ T-1 គឺជួយជាកម្លាំងគាំទ្រដល់កងទ័ពជើងគោក រួមទាំងការវាយប្រហារ ក្នុងអំឡុងពេលឆ្លងកាត់ទន្លេ ព្រែក និងតំបន់វាលភក់ ប្រឆាំងនឹងរថក្រោះ ព្រមទាំងរថពាសដែកធុនស្រាលរបស់សត្រូវ ។

ប្រសិនបើអ្វីៗដំណើរការរលូន វៀតណាមនឹងចាប់ផ្តើមផលិតរថក្រោះ T-1 ហើយចាប់ផ្តើមដំណើរការសាកល្បងនៅចុងឆ្នាំនេះ ខណៈវៀតណាមរំពឹងថា នឹងដាក់តាំងបង្ហាញវាជាផ្លូវការ នៅឯពិព័រណ៌ VIDEX ក្នុងទីក្រុងហាណូយ ចាប់ពីថ្ងៃទី១០ ដល់១៣ ខែធ្នូ ឆ្នាំ ២០២៦ ខាងមុខ ៕

ប្រភព ៖ Asian military review ប្រែសម្រួល ៖ ឈឹម ទីណា