សៀមរាប៖រដ្ឋបាលខេត្តសៀមរាបរួមជាមួយមន្ទីរជំនាញ និងសហភាពសហព័ន្ធយុវជនកម្ពុជាខេត្ត នឹងប្រារព្ធព្រឹត្តិការណ៍“បុណ្យខ្លែងឯក ខ្លែងសេរី” លើកទី២ រយៈពេល៣ថ្ងៃក្នុងសប្ដាហ៍ទី៣នៃខែកុម្ភៈនេះនាព្រលានយន្តហោះចាស់។អមជាមួយកម្មវិធីនេះ ក៏នៅមានព្រឹត្តិការណ៍ផ្សេងៗទៀតដូចជា ការសម្ដែងតន្រ្តី ការសម្ដែងលោ្ខនបាសាក់ ល្ខោននិយាយ និងពិព័រណ៍ ភូមិមួយ ផលិតផលមួយ ជាដើម។
ពិធី “បុណ្យខ្លែងឯក ខ្លែងសេរី” លើកទី២ នឹងរៀបចំឡើងរយៈពេល៣ថ្ងៃ ចាប់ពីថ្ងៃទី២០ ដល់ទី២២ ខែកុម្ភៈ ឆ្នាំ២០២៦ខាងមុខនៅអតីតព្រលានយន្តហោះអន្តរជាតិខេត្តសៀមរាប។ គិតត្រឹមថ្ងៃព្រហស្បតិ៍កន្លងទៅនេះមានខ្លែងចុះឈ្មោះសរុបចំនួន ៨៥ ខ្លែង ក្នុងនោះមានខ្លែងឯក៥៦ និងខ្លែងសេរី ២៩ខ្លែង។ការទទួលពាក្យចូលរួមមិនទាន់បិទបញ្ចប់នៅឡើយទេ។អ្នកដែលមានបំណងចង់ចូលរួមប្រកួតអាចមកដាក់ពាក្យនៅបរិវេណមន្ទីរវប្បធម៌ និងវិចិត្រសិល្បៈខេត្តសៀមរាប ។
គួរជម្រាបថា នៅខេត្តសៀមរាបដដែលពិធីបុណ្យខ្លែងឯក ខ្លែងសេរី” លើកទី១ បានប្រព្រឹត្តទៅនៅចុងខែធ្នូឆ្នាំ២០២៤ ដោយមាន
អ្នកចូលរួមបង្ហោះខ្លែងជាច្រើនរយនាក់ និងមកពីបណ្ដាលខេត្តជាច្រើន។ដោយឡែកការរៀបចំលើកទី២ គណៈកម្មការរៀបចំក៏មានក្តីរំពឹងខ្ពស់ចំពោះវត្តមានចូលរួមពីអ្នកស្រឡាញ់ និងមានចំណេះជំនាញក្នុងវិស័យនេះផងដែរ។ រដ្ឋបាលខេត្តសៀមរាបបានត្រៀមលក្ខណៈរួចរាល់សម្រាប់ព្រឹត្តិការណ៍៣ថ្ងៃនេះ។
លោក លី សារី អភិបាលរងខេត្តសៀមរាបបានបញ្ជាក់ក្នុងកិច្ចប្រជុំត្រួតពិនិត្យការងារកាលពីថ្ងៃទី១១ ខែកុម្ភៈថា ព្រឹត្តិការណ៍ឆ្នាំនេះមិនត្រឹមតែជាការកម្សាន្តប៉ុណ្ណោះទេ ប៉ុន្តែគឺជាការដាស់ស្មារតីយុវជនឱ្យឈ្វេងយល់ពីមរតកដូនតានិងជាការបង្កើតព្រឹត្តិការណ៍
សម្រាប់វិស័យទេសចរណ៍ផងដែរ។
សូមជម្រាបថា ក្រៅពីការបង្ហោះខ្លែង ក៏មានការចូលរួមពីចលនា “ភូមិ១ ផលិតផល១” ដោយមានកម្មវិធីពិព័រណ៍ផលិតផលក្នុងស្រុក ម្ហូបអាហារ ការសម្ដែងល្ខោនបាសាក់ ល្ខោននិយាយ ការប្រគំតន្ត្រីបុរាណ-សម័យនាពេលរាត្រីទៀតផង៕
ដោយ៖ប៊ុនរដ្ឋា
