ភ្នំពេញ៖សម្តេចតេជោ ហ៊ុន សែន បានជំរុញឱ្យកងទ័ពកម្ពុជានិងឡាវ ពង្រីកនូវការចែករំលែកបទពិសោធន៍គ្នា ក្នុងការបណ្ដុះបណ្ដាលធនធានមនុស្សទៅវិញទៅមកឱ្យកាន់តែផុលផុសនិងមានចំនួនច្រើនជាងមុន តាមរយៈការផ្ដល់អាហារូបករណ៍ក្នុងវិស័យការពារជាតិ ដោយសម្ដេចតេជោយល់ថា ដើម្បីជាផ្នែកក្នុងការរុញច្រាន នៃការបណ្ដុះបណ្ដាលមូលធនមនុស្សក្នុងវិស័យការពារជាតិសម្រាប់ប្រទេសទាំងពីរ ។នេះបើតាមឯកឧត្តម ជា ធីរិទ្ធ អ្នកនាំពាក្យព្រឹទ្ធសភា បានឱ្យដឹងនៅក្រោយជំនួបសម្ដែងការគួរសមនិងពិភាក្សាការងាររវាងសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភាជាមួយឯកឧត្តមឧត្តមសេនីយ៍ឯក សាយចៃ គុមម៉ាស៊ីត (Saichay Kommasith) អនុរដ្ឋមន្ត្រីក្រសួងការពារប្រទេស និងជាប្រធានអគ្គសេនាធិការកងទ័ពប្រជាជនឡាវនៅវិមានសាមគ្គីភាព នាព្រឹកថ្ងៃទី១៧ ខែកុម្ភៈ ឆ្នាំ២០២៦។
ឯកឧត្តម ជា ធីរិទ្ធ បានឱ្យដឹងថា ក្នុងជំនួបសម្ដេចតេជោ ហ៊ុន សែនបានចាត់ទុកដំណើរទស្សនកិច្ចរបស់ឯកឧត្តមអនុរដ្ឋមន្ត្រីការពារជាតិឡាវមកកាន់កម្ពុជានេះ នឹងក្លាយជាចលករដ៏សំខាន់ក្នុងការជំរុញទំនាក់ទំនងទ្វេភាគី រវាងកម្ពុជា-ឡាវ ឱ្យកាន់តែរីកចម្រើនបន្ថែម .និយាយដោយឡែក គឺទំនាក់ទំនងកិច្ចសហប្រតិបត្តិការរវាងកងទ័ពនៃប្រទេសទាំងពីរ កាន់តែស៊ី ជម្រៅ ខណៈថ្មីៗនេះ ថ្នាក់ដឹកនាំកំពូលឡាវ មានដូចជា ឯកឧត្តម ថងលូន ស៊ីសូលីត អគ្គលេខាធិការបក្សប្រជាជនបដិវត្តន៍ឡាវ និងជាប្រមុខរដ្ឋរបស់ឡាវ បានអញ្ជើញមកបំពេញទស្សនកិច្ច នៅក្នុងព្រះរាជាណាចក្រកម្ពុជា ដែលជាចំណុចដល់ សំខាន់នៃការ ឆ្លុះបញ្ចាំងពីទំនាក់ទំនងដ៏ល្អរវាងកម្ពុជា និងឡាវ នាពេលបច្ចុប្បន្ន ។
ក្នុងឱកាសនោះ ឯកឧត្តម សាយចៃ គុមម៉ាស៊ីត អនុរដ្ឋមន្ត្រីការពារជាតិឡាវបានប្ដេជ្ញា នឹងខិតខំប្រឹងប្រែងពូនជ្រុំនៃទំនាក់ទំនងរវាងកងទ័ពប្រទេសទាំងពីរឱ្យកាន់តែរីកចម្រើនបន្តទៀត ។ឯកឧត្តម បានវាយតម្លៃខ្ពស់ចំពោះកិច្ចសហប្រតិបត្តិការរវាងប្រទេសទាំងពីរនៅតាមព្រំដែនដែលជាព្រំដែនសន្តិភាព កិច្ចសហប្រតិបត្តិការជាមួយគ្នា ហើយមានសុខសន្តិភាព និងសុវត្ថិភាពជាមួយគ្នាបានល្អតាមរយៈការសហការរវាងប្រទេសទាំងពីរ ក៏ដូចជាកងទ័ព អាជ្ញាធរនៃប្រទេសទាំងពីរផងដែរ ។
ខណៈឯកឧត្តមអនុរដ្ឋមន្រ្តីក្រសួងការពារជាតិឡាវបំពេញទស្សនកិច្ចនៅកម្ពុជា, ឯកឧត្តមបានជួបពិភាក្សាជាមួយឯកឧត្តមអគ្គមេបញ្ជាការកងយោធពលខេមរភូមិន្ទកម្ពុជា ,រដ្ឋមន្ត្រីការពារជាតិកម្ពុជាផងដែរ។ឯកឧត្តម សាយចៃ គុមម៉ាស៊ីត បានចាត់ទុកបណ្ដាជំនួបទាំងឡាយជាកត្តាដ៏សំខាន់ក្នុងការដាក់ចេញនូវផែនការពង្រីកនូវទំនាក់ទំនងទ្វេភាគី ក្នុងក្របខ័ណ្ឌកងទ័ពកម្ពុជា និងកងទ័ពប្រជាជនឡាវ ។
សម្ដេចតេជោ ហ៊ុន សែន បានបញ្ជាក់ជូនអនុរដ្ឋមន្រ្តីក្រសួងការពារជាតិឡាវនូវក្ដីរីករាយដែលបានឃើញកិច្ចសហប្រតិបត្តិការល្អនៅតាមព្រំដែន រវាងកម្ពុជា និងឡាវ ។សម្ដេចសង្ឃឹម នឹងជំរុញបន្ថែមឱ្យអាជ្ញាធរ ក៏ដូចជាកងទ័ពនៃប្រទេសទាំងពីរ ធ្វើការជាមួយគ្នាបន្ថែមទៀត ដើម្បីធ្វើយ៉ាងណា រក្សានូវសន្តិភាពសន្តិសុខតាមព្រំដែននេះឱ្យបានកាន់តែល្អប្រសើរបន្តទៀត ។ សម្ដេចតេជោ ក៏បានផ្ដល់យោបល់ឱ្យធ្វើកិច្ចសហប្រតិបត្តិការតាមព្រំដែននៅក្នុងក្របខ័ណ្ឌនៃការពង្រីកទំនាក់ទំនងល្អ ដូចជា ការប្រយុទ្ធប្រឆាំងឧក្រិដ្ឋកម្មឆ្លងដែនជាដើម ។លើសពីនេះ សម្ដេចតេជោ ក៏ចង់ឃើញកិច្ចសហប្រតិបត្តិការសម្រាប់គ្រប់គ្រងគ្រោះមហន្តរាយនៅតាមព្រំដែនដូចជា ទឹកជំនន់នៅតាមព្រំដែនរវាងប្រទេសទាំងពីរ ឬក៏ភ្លើងឆេះព្រៃជាដើម ដើម្បីឱ្យកិច្ចសហប្រតិបត្តិការតាមព្រំដែនរបស់កម្ពុជា និងឡាវ មានគ្រប់ទម្រង់ និងកាន់តែស៊ីជម្រៅបន្ថែមទៀត៕
អត្ថបទ៖ វណ្ណលុក
រូប៖ វ៉េង លីមហួត និង សួង ពិសិដ្ឋ
