ភ្នំពេញ៖ពីរសប្តាហ៍ក្រោយពីប្រទេសកម្ពុជា បានប្រកាសថា ខ្លួនបានដាក់សំណើរជាផ្លូវការដើម្បីស្នើសុំឯកសារប្រវត្តិសាស្ត្រទាក់ទងនឹងព្រំដែនអន្តរជាតិ កម្ពុជា-ថៃ រដ្ឋមន្ត្រីការបរទេសថៃ លោក ស៊ីហាសាក់ ភួងកេតកែវ និយាយថា ប្រទេសថៃ ក៏ត្រៀមស្នើសុំឯកសារចាំបាច់ពីប្រទេសបារាំងផងដែរ។
លោក ស៊ីហាសាក់ ភួងកេតកែវ ត្រូវស្រង់សម្តីនៅថ្ងៃអង្គារ៍នេះ ដោយកាសែត ឌឹ ណេសិន(The Nation) ថា ក្រសួងការបរទេសថៃ ក៏កំពុងពិនិត្យសំណើទៅកាន់ប្រធានាធិបតីបារាំង លោក អេម៉ានុយអែល ម៉ាក្រុង សម្រាប់ឯកសារប្រវត្តិសាស្ត្រទាក់ទងនឹងព្រំដែនផងដែរ។ លោកបន្តថា ក្រសួងការបរទេសថៃបានសាកសួរជាមួយប្រទេសបារាំងទាក់ទងនឹងឯកសារទាំងនេះរួចហើយ។
កាលពីថ្ងៃទី៤ ខែកុម្ភៈ ឆ្នាំ២០២៦ ក្រសួងការបរទេសកម្ពុជា បានឱ្យដឹងថា រដ្ឋាភិបាលបានដាក់សំណើរជាផ្លូវការសុំឯកសារពាក់ព័ន្ធនឹងផែនទីអន្តរជាតិ កម្ពុជា-ថៃ ទៅកាន់ប្រទេសបារាំង ព្រមទាំងស្នើសុំប្រទេសបារាំងពិចារណា ផ្តល់ការគាំទ្រផ្នែកបច្ចេក ទេស ជំនាញ និងការប្រឹក្សារយោបល់ផងដែរ។
សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានលើកឡើងថា កម្ពុជាបានត្រៀមខ្លួនធ្វើការយ៉ាងជិតស្និទ្ធជាមួយបារាំង និងសហគមន៍អន្តរជាតិ ដើម្បីការពារសន្តិភាពតាមរយៈការគោរពច្បាប់អន្តរជាតិ និងការដោះស្រាយដោយសន្តិវិធី។
គម្រោងការស្នើសុំឯកសារព្រំដែនរបស់ប្រទេសថៃ ពីលោកប្រធានាធិបតីបារាំង អេម៉ានុយអែល ម៉ាក្រុង ធ្វើឡើងស្រប ពេលដែល សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាអញ្ជើញចូលរួមកិច្ចប្រជុំក្រុមប្រឹក្សាសន្តិភាព (Board of Peace) នៅរដ្ឋធានី វ៉ាស៊ីនតោន សហរដ្ឋអាមេរិក និងទស្សនកិច្ចការងារ នៅទីក្រុងហ្សឺណែវ ប្រទេសស្វីស និងទីក្រុងព្រុចសែល ប្រទេសបែលហ្សិក ចាប់ពីថ្ងៃទី១៥-២៧ ខែកុម្ភៈ ឆ្នាំ២០២៦។
រដ្ឋមន្ត្រីការបរទេសថៃ លោក ស៊ីហាសាក់ អះអាងថា ប្រទេសកំពុងតាមដានយ៉ាងដិតដល់នូវរបាយការណ៍ស្តីពីដំណើរទស្សនកិច្ច អន្តរជាតិរបស់សម្ដេចធិបតី ហ៊ុន ម៉ាណែត រួមទាំងកិច្ចប្រជុំរបស់លោកជាមួយអតីតប្រធានាធិបតីសហរដ្ឋអាម៉េរិក ដូណាល់ ត្រាំ៕
