ភ្នំពេញ៖អ្នកជំនាញច្បាប់មកពីសហរដ្ឋអាម៉េរិក បានជំរុញឱ្យក្រុមអ្នក​សង្កេត​ការណ៍អាស៊ាន(AOT) ផ្សព្វផ្សាយព័ត៌មានពិត និង​ឱ្យបានច្បាស់​លាស់ពីជម្លោះព្រំដែនរវាងកម្ពុជា និងថៃ ខណៈដែលក្រុមនេះស្ថិតនៅ​ស្ងៀម​ស្ងាត់បើទោះជាក្រុមយោធាថៃ នៅតែ​បន្តបំពានមកលើដែនអធិប​តេយ្យ​កម្ពុជាក៏ដោយ។

លោក ឆាំង យុ នាយកមជ្ឈមណ្ឌលឯកសារកម្ពុជា លើកឡើងថា របាយការណ៍​ដែលចេញពីក្រុម អេ អូ ធី ពិតជាមានសារសំខាន់ និងមានតម្លៃជាលក្ខណៈអន្តរជាតិ ជុំវិញការឈ្លានពានរបស់ប្រទេសថៃ​មកលើកម្ពុជា ដោយហេតុថា ការរំលោភបំពានទាំងនេះ មិនត្រឹមតែជា​ការរំលោភបំពានមកលើដែនអធិបតេយ្យភាពរបស់កម្ពុជាប៉ុណ្ណោះទេ ប៉ុន្តែវាគឺជាការមិនគោរព និងរំលោភបំពាន​ទៅលើបទឈប់បាញ់ដែលផ្ដួច​ផ្ដើមឡើងដោយសហរដ្ឋអាមេរិក និងអាស៊ាន។

ដោយទាមទារឱ្យ AOT បង្ហាញជំហរអព្យាក្រឹត្យរបស់ខ្លួនក្នុងការ​ផ្សព្វផ្សាយព័ត៌មានពិតពីកម្ពុជា អ្នកជំនាញច្បាប់ដដែលនេះ បាន​លើកឧទាហរណ៍ ដ៏គួរឱ្យសោកស្តាយនៃហេតុការណ៍ថ្មីៗនេះ ដែលយោធាថៃជីកប្រឡាយនៅភូមិជោគជ័យ ក្នុងដែនដី​អធិបតេយ្យ​របស់កម្ពុជា។ ប៉ុន្តែព័ត៌មាននេះមិនបានផ្សព្វផ្សាយទៅដល់​ប្រទេសណា​មួយក្នុងតំបន់ ឬក្នុងពិភពលោកនោះទេ ហើយប្រសិនបើ អេ អូ ធី ចុះពិនិត្យទៅលើការជីកប្រឡាយនៅភូមិជោគជ័យ និងបានផ្សព្វផ្សាយ​ព័ត៌មានទៅ​កាន់ពិភពលោក​គឺពិតជាមានឥទ្ធិពលក្នុងការបន្ទុចបង្អាក់ ឬក៏រារាំងប្រទេសថៃកុំឱ្យបន្តធ្វើការឈ្លានពានមកលើទឹកដីប្រទេសកម្ពុជា រហូតដល់មាន​ការប្រជុំសាជាថ្មីឡើងវិញ អំពីការបោះបង្គោលដែនសីមា។

ក្រុមអ្នកសង្កេតការណ៍អាស៊ាន (AOT) ត្រូវបានបង្កើតឡើងក្នុងឆ្នាំ ២០២៥ ក្រោមគំនិតផ្តួចផ្តើមរបស់ប្រទេសម៉ាឡេស៊ី ក្នុងគោល​បំណងត្រួតពិនិត្យ តាមដាន និងផ្ទៀងផ្ទាត់ស្ថានភាពជម្លោះព្រំដែនរវាងកម្ពុជា និងថៃ។ ក្រុមការងារនេះត្រូវបាន​បែងចែកជាពីរផ្នែក គឺក្រុម AOT ប្រចាំកម្ពុជា និងក្រុម AOT ប្រចាំប្រទេសថៃ។

ក្រុម AOT ទាំងពីរភាគីបានចុះត្រួតពិនិត្យ និងផ្ទៀងផ្ទាត់ជាក់ស្តែងនៅទី​តាំង​ជម្លោះជាច្រើនលើកច្រើនសារ ប៉ុន្តែរហូតមកដល់​ពេលនេះ មិនទាន់​បានចេញសេចក្តីថ្លែងការណ៍រួមជាផ្លូវការណាមួយនៅឡើយទេ។

លោក ឆាំង យុ កត់សម្គាល់ថា របាយការណ៍នេះកាន់តែមានសារៈ​សំខាន់​ទៅទៀត ស្របពេលដែលមិនទាន់មានឯកអគ្គរដ្ឋ​ទូតសហរដ្ឋអាម៉េរិកប្រចាំ​នៅកម្ពុជានៅឡើយ ខណៈដែលនៅប្រទេសថៃមានអគ្គរដ្ឋទូតសហរដ្ឋ​អាម៉េរិក ហើយលោក ទទូចថា AOT ត្រូវតែបង្ហាញឱ្យច្បាស់ថា ទង្វើ​ទាំងនេះគឺជាការមិនផ្ដល់តម្លៃដល់សហរដ្ឋអាម៉េរិក និងអាស៊ាន។ ជាពិសេស AOT បាច់ត្រូវតែមានវិធានការខ្លាំងក្លាជាងសព្វនេះ ក្នុងការ​ផ្សព្វផ្សាយ​ជាសាធារណៈអំពីការរំលោភបំពាននានារបស់ប្រទេស​ថៃមកលើប្រទេសកម្ពុជា។

កាលពីថ្ងៃទី១៣ ខែកុម្ភៈ ឆ្នាំ២០២៦​អគ្គមេបញ្ជាការកងទ័ពហ្វីលីពីន លោក ROMEO S BRAWNER JR ក្នុងនាមប្រធាន​អាស៊ានប្តូរវេន បានចុះទៅ​ត្រួតពិនិត្យដោយផ្ទាល់នៅតំបន់ព្រំដែនក្នុងខេត្តបន្ទាយមានជ័យ។
លោក ROMEO S BRAWNER JR បានលើកឡើងថា ប្រទេសហ្វ៊ីលីពីន នឹងបន្តដើរតួជាអ្នកសម្របសម្រួលក្រុមអ្នក​សង្កេត​ការណ៍អាស៊ាន AOT ដើម្បីដោះស្រាយជម្លោះព្រំដែន កម្ពុជា ថៃ ដោយឯករាជ្យ។

សម្ដេចធិបតី ហ៊ុន ម៉ាណែត នាយកករដ្ឋមន្រ្តីកម្ពុជា សង្ឃឹមថា ក្រោម​ការដឹកនាំរបស់ហ្វីលីពីនជាប្រធានអាស៊ានក្រុម AOT នឹងដើរតួយ៉ាង​សកម្មក្នុងការសម្របសម្រួលវិវាទព្រំដែនកម្ពុជា-ថៃឱ្យមានសន្តិភាព។

យោងតាមសេចក្តីថ្លែងការណ៍របស់ក្រសួងការបរទេស កងទ័ពថៃកំពុង​បន្តកាន់កាប់ទីតាំងចំនួន ១៤ កន្លែងក្នុងដែនអធិបតេយ្យ​ភាពរបស់កម្ពុជា​ដោយខុសច្បាប់ ដែលសកម្មភាពនេះ បានកើតឡើងបន្ទាប់ពីការបង្ក​សង្គ្រាម​ឈ្លានពានយ៉ាងអាក្រក់បំផុត​ក្នុងរយៈពេល ២១ ថ្ងៃ កាលពីឆ្នាំមុន៕

ដោយ៖ទួន សុផល