ភ្នំពេញ៖ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ កាលពីព្រឹកថ្ងៃទី១ ខែមីនា ឆ្នាំ២០២៦ បានអញ្ជើញជា​អធិបតីក្នុង​ព្រឹត្តិការណ៍ជិះស៊ីក្លូពី​រាជធានី​ភ្នំពេញឆ្ពោះទៅកាន់ក្រុងស្ទឹងត្រែង ខេត្តស្ទឹងត្រែង ក្រោមពាក្យ​ស្លោក៖ ផ្តល់ក្តីសង្ឃឹមដល់​ស៊ីក្លូ​កម្ពុជា។ជាមួយគ្នានេះក្រសួងទេស​ចរណ៍ក៏បានឱ្យដឹងថា នៅក្នុងខែមីនា នឹងមានព្រឹត្តិការណ៍ទេសចរណ៍ធំៗ​មួយចំនួននឹង​ប្រារព្ធនៅព្រះរាជាណាចក្រកម្ពុជា។

ដោយចាប់ផ្តើមជានិមិត្តរូបនាវិមានឯករាជ្យ រាជធានីភ្នំពេញកាល​ពីព្រឹកថ្ងៃទី១ ខែមីនា ឆ្នាំ២០២៦ឯកឧត្តម ហួត ហាក់ រដ្ឋមន្ត្រី​ក្រសួងទេស​ចរណ៍ បានអញ្ជើញជា​អធិបតីក្នុង​ព្រឹត្តិការណ៍ជិះស៊ីក្លូពីរាជធានីភ្នំពេញ​ឆ្ពោះទៅកាន់ក្រុងស្ទឹងត្រែង ខេត្ត​ស្ទឹងត្រែង ក្រោមពាក្យស្លោក៖ ផ្តល់ក្តី​សង្ឃឹមដល់​ស៊ីក្លូកម្ពុជា ខណៈនេះជាព្រឹត្តិការណ៍​ទេស​ចរណ៍នាដើម​ខែមីនាស្របពេលកម្ពុជាមាន​មោទកភាពដែល​រាជធានីភ្នំពេញជាប់​ចំណាត់ថ្នាក់​លេខ១០ ក្នុងបណ្តាទីក្រុងធំៗដែល​ល្អបំផុតលើ​ពិភពលោកឆ្នាំ២០២៥។

បើតាមក្រសួងទេសចរណ៍ប្រកាសឱ្យដឹងក្នុងខែមីនា ឆ្នាំ២០២៦​ព្រះរាជាណាចក្រកម្ពុជានឹងមានព្រឹត្តិការណ៍ទេសចរណ៍សំខាន់ៗ
មួយចំនួននឹងកើតឡើង ។ក្នុងនេះ ពីថ្ងៃទី២៦ ខែកុម្ភៈ ដល់ថ្ងៃទី១ ខែមីនា កម្ពុជាបានរៀបចំពិព័រណ៍ផលិតផលខ្មែរ និងបន្លែផ្លែ​ឈើ លើកទី១៩ នៅខេត្តសៀមរាប ។នៅថ្ងៃទី១ ខែមីនាព្រឹត្តិការណ៍ធ្វើដំណើរដោយជិះស៊ីក្លូ ពីរាជធានីភ្នំពេញ ទៅកាន់ក្រុង​ស្ទឹងត្រែង ដែលឯកឧត្តមមន្រ្តីក្រសួង​ទេសចរណ៍បានអញ្ជើញរួមមកហើយ។

នៅថ្ងៃទី៣ ខែមីនា នឹងមានទិវាវប្បធម៌ជាតិលើកទី២៨ នៃព្រះ​រាជា​ណាចក្រកម្ពុជា ខណៈពីថ្ងៃទី៦ ដល់ថ្ងៃទី៨ ខែមីនា នឹងមានពិព័រណ៍​រថយន្តលើកទី៣ ឆ្នាំ២០២៦ នៅរាជធានីភ្នំពេញ ។

ដោយឡែកពីថ្ងៃទី៦ ដល់ថ្ងៃទី៧ ខែមីនា នឹងមានពិព័រណ៍ការងារ ២០២៦ នៅរាជធានីភ្នំពេញ ។ថ្ងៃទី៧ ខែមីនា នឹងមាន​ព្រឹត្តិការណ៍​ព្យុហយាត្រា​ទេស​ចរណ៍ នៅខេត្តស្ទឹងត្រែង ខណៈនៅថ្ងៃទី៨ ខែមីនា នឹងមានទិវាអន្តរ​ជាតិនារីនៃព្រះរាជា​ណាចក្រកម្ពុជា។

ដើម្បីអបអរទិវាអន្តរជាតិនារី​នៅថ្ងៃទី៨ ខែមីនា នឹងមានទិវារត់ប្រណាំងស្ត្រី ចម្ងាយ ១០គីឡូម៉ែត្រ នៅរាជធានីភ្នំពេញ និង​ព្រឹត្តិការណ៍​ជិះកង់​ភ្នំពេញ-តាកែវ ។

ពីថ្ងៃទី១១ ដល់ថ្ងៃទី១៥ ខែមីនា នឹងមានទិវាជាតិអំណានលើកទី១១ នៅ​រាជធានីភ្នំពេញនិងនៅឯខេត្តព្រះសីហនុពីថ្ងៃទី១៨ ដល់ថ្ងៃទី១៩ ខែមីនា នឹងមានព្រឹត្តិការណ៍ទេសចរណ៍ធុរកិច្ចកម្ពុជា-ចិន។

ពីថ្ងៃទី២០ ដល់ថ្ងៃទី២២ ខែមីនា កម្ពុជានឹងពិព័រណ៍ទេសចរណ៍ វប្បធម៌ និងម្ហូបអាហារ នៅរាជធានីភ្នំពេញ ស្របពេលពី​ថ្ងៃទី២១ ដល់​ថ្ងៃទី​២៣ ខែមីនា នឹងមានព្រឹត្តិការណ៍សមរាត្រីអង្គរនៅខេត្តសៀមរាប ។

នៅថ្ងៃទី២២ ខែមីនា នឹងមានទិវារត់ប្រណាំងអន្តរជាតិពាក់កណ្តាល​ម៉ារ៉ាតុង លើកទី១១ នៅខេត្តព្រះសីហនុ ខណៈពីថ្ងៃទី​២៤ ដល់ថ្ងៃទី២៩ ខែមីនា កម្ពុជានឹងមហោស្រពភាពយន្តអន្តរជាតិនៅរាជធានីភ្នំពេញ ។

ពីថ្ងៃទី២៦ ដល់ថ្ងៃទី២៨ ខែមីនា ទិវាជាតិវិទ្យាសាស្ត្រ បច្ចេកវិទ្យា និងនវា​នុវត្តន៍លើកទី៤ នឹងប្រារព្ធនៅភ្នំពេញ ហើយនៅថ្ងៃ​ទី២៨ ខែមីនា នេះដែរ​នឹងមានពិធីអបអរសាទរខួបគម្រប់ ១០ឆ្នាំនៃកិច្ចសហប្រតិបត្តិការមេគង្គ-ឡានឆាង៕

ដោយ៖មុនី