សៀមរាប៖ អគ្គលេខាធិការអង្គការហ្វ្រង់កូហ្វូនី ដែលជាអង្គការប្រមូល​ផ្តុំដោយប្រទេសនិយាយភាសាបារាំងប្រមាណ ៩០ ប្រទេស បានអះអាង​នៅថ្ងៃអង្គារថា ប្រទេសសមាជិកអង្គការទាំងអស់សម្តែងសមាន​ចិត្តជាមួយ​ប្រជាពលរដ្ឋភៀសសឹក​កម្ពុជាដែលកំពុង​តែស្ថិតក្នុងការលំបាក។

លោកជំទាវ ល្វីស មូស៊ីគីវ៉ាបូ (Louise MUSHIKIWABO) បានលើក​ឡើងយ៉ាងដូច្នេះ ខណៈដែលលោកស្រីអញ្ជើញទស្សនកិច្ច​រយៈពេលខ្លី​មួយ​ទៅកាន់ជំរំជនភៀសសឹកកម្ពុជាក្នុងវត្តធម្មរង្សី សំពៅកូន ស្ថិតក្នុងស្រុកក្រឡាញ់ខេត្តសៀមរាប។

លោកជំទាវបានបញ្ជាក់«យើងបានតាមដាននូវការលំបាកទាំងឡាយដែលអ្នកបានជួបប្រទះ ទោះបីជាក្នុងអំឡុងពេលទស្សនកិច្ច​ដ៏ខ្លីក៏ដោយ។ នេះគឺជាការសម្ដែងនូវសាមគ្គីភាពសម្រាប់គ្រួសារនិយាយភាសាបារាំងទាំងអស់នៅលើពិភពលោក»។

យោងតាមរបាយការណ៍របស់ក្រសួងមហាផ្ទៃ គិតត្រឹមថ្ងៃទី២ ខែមីនា ឆ្នាំ២០២៦ ជនភៀសសឹកដែលបន្តស្នាក់នៅក្នុងជំរំ​ជន​ភៀសសឹកមាន​ចំនួនជិត ៥ ម៉ឺននាក់។ មូលហេតុដោយសារលំនៅឋានរបស់​ពួកគេត្រូ​វ​ទាហានថៃហ៊ុមព័ទ្ធយក និងរារាំងមិនឱ្យ​ពួកគេចូលរស់នៅបាន។ មួយវិញទៀត តំបន់មួយចំនួនត្រូវរង់ចាំការបោសសម្អាត​យុទ្ធភណ្ឌ​មិនទាន់ផ្ទុះ សល់ពីសង្គ្រាម។

ដំណើរទស្សនកិច្ចរបស់ លោកជំទាវ ល្វីស មូស៊ីគីវ៉ាបូ គឺជាផ្នែកមួយនៃ​ការត្រៀមរៀបចំកិច្ចប្រជុំកំពូលហ្វ្រង់កូហ្វូនី នៅក្នុងទីក្រុង​ភ្នំពេញ​ក្នុង​ខែវិច្ឆិកា ឆ្នាំ ២០២៦។ កិច្ចប្រជុំដែលនឹងមានការចូលរួមពីប្រមុខរដ្ឋ និងប្រមុខរដ្ឋាភិបាលពីប្រទេសចំនួន ៩០។ លោកជំទាវបានដឹកនាំគណៈប្រតិភូដែលមានសមាជិកមកពីប្រទេស សេណេហ្គាល់ រូម៉ានី បារាំង កម្ពុជា បែលហ្ស៊ិក រវ៉ាន់ដា និងប្រទេសជីប៊ូទី។

នៅចំពោះមុខពលរដ្ឋភៀសសឹក លោកជំទាវអគ្គលេខាធិការ​អង្គការ​ហ្វ្រង់កូហ្វូន បានបង្ហាញក្តីអាណិតអាសូរ និងបានទទួលស្គាល់​ពីទុក្ខ​លំបាកដែលជនភៀសសឹកកម្ពុជាកំពុងប្រឈម នៅពេលដែល​ប្រទេស Rwanda (រវ៉ាន់ដា) របស់លោកជំទាវ​ធ្លាប់បាន​ឆ្លង​កាត់បញ្ហាដូចគ្នា ហើយក្រុមគ្រួសាររបស់លោកជំទាវក៏មានបទពិសោធន៍ដូចពលរដ្ឋកម្ពុជាផងដែរ។

ជាមួយគ្នានេះ លោកជំទាវ ល្វីស មូស៊ីគីវ៉ាបូ «ចង់ឱ្យស្ថានភាពដ៏លំបាក»​ដែលប្រជាពលរដ្ឋកម្ពុជាកំពុងជួបប្រទះនេះ ត្រូវបាន​ដោះស្រាយបានឆាប់​រហ័សបំផុតតាមដែលអាចធ្វើទៅបាន ដើម្បីអនុញ្ញាតឱ្យពួកគេអាចវិល​ត្រឡប់ទៅរកជីវិតធម្មតាវិញ»។

ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស ដែលបាន​អមដំណើរគណៈប្រតិភូអង្គការហ្វ្រង់កូហ្វូនី បានគូស​បញ្ជាក់ដល់​ពលរដ្ឋ​ភៀសសឹកថា រាជរដ្ឋាភិបាល «ខិតខំធ្វើយ៉ាងម៉េចរកដំណោះស្រាយដោយ​សន្តិវិធី»ដើម្បីពលរដ្ឋទាំងនេះ​អាចវិលត្រឡប់ទៅកាន់លំនៅស្ថានពួកគេ​វិញ​ក្នុងពេលខាងមុខ៕

ដោយ៖ង៉ាន ទិត្យ -សៅ សុខអេង