ភ្នំពេញ៖ សង្គ្រាមនៅអ៊ីរ៉ង់ ដែលដឹកនាំដោយសហរដ្ឋអាម៉េរិក និងដៃគូ អ៊ីស្រាអែល នឹងរុញឱ្យតម្លៃប្រេងហក់ឡើងខ្ពស់ ដែលនឹង​បង្កឱ្យមាន​កំណើន​អតិផរណាសកល រួមទាំងសម្រាប់សេដ្ឋកិច្ចកម្ពុជាផងដែរ។នេះគឺជាការវាយតម្លៃរបស់​អ្នកជំនាញ​សេដ្ឋកិច្ច​កម្ពុជា៣ថ្ងៃ​ក្រោយពី​ការផ្ទុះសង្គ្រាមនៅតំបន់មជ្ឈិមបូព៌ានេះ។

លោកបណ្ឌិត ឌុច ដារិន្ទ អ្នកជំនាញសេដ្ឋកិច្ចនៅកម្ពុជា បានកត់សម្គាល់​ឃើញថាក្រោយការផ្ទុះឡើងនៃជម្លោះនៅអ៊ីរ៉ង់ តម្លៃ​ប្រេងសាកល បានហក់ឡើងប្រមាណ ១០ភាគរយ ឬកើនប្រហែល ៨០ដុល្លារក្នុងមួយ​បារ៉ែល។ លោកថាបើសង្គ្រាម​បន្តអូស​បន្លាយនោះមិនត្រឹមតែប៉ះពាល់​ដល់ខ្សែច្រវាក់ផ្គត់ផ្គង់សាកល ប៉ុណ្ណោះទេ ប៉ុន្តែ វាក៏ប៉ះពាល់ដល់ខ្សែច្រវាក់​ផលិតកម្ម​របស់​កម្ពុជាផងដែរ។

លោកថ្លែងថា «តាមហេតុផលសេដ្ឋកិច្ចពេលតម្លៃប្រេងឡើងនឹង​ធ្វើឱ្យ​ថ្លៃដឹកជញ្ជូន និងថ្លៃផលិតកម្មកើនឡើង ហើយជំរុញឱ្យ​អតិផរណា​កើនឡើងដែរ»។

ចំណែកលោកស្រីបណ្ឌិត ព្រុំ ទេវី អ្នកជំនាញវិទ្យាសាស្រ្តសេដ្ឋកិច្ច កត់សម្គាល់ថា តម្លៃប្រេងឡើងថ្លៃនេះ នឹងរុញសន្ទុះ​អតិផរណាកាន់​តែឡើងខ្ពស់ថែមទៀត។

លោកស្រីថ្លែងថា«រឿងអតិផរណាគឺជៀសមិនរួចទេវាមានរាល់តែឆ្នាំហ្នឹង។ ហើយបើសិនជាមានបញ្ហាប្រេងឡើងថ្លៃ អតិផរណា​អាចឡើងខ្ពស់ជាង​នេះទៅទៀត»។

ចំណែក លោកបណ្ឌិត គិន ភា ប្រធានវិទ្យាស្ថានទំនាក់​ទំនង​អន្តរជាតិ​កម្ពុជា មើលឃើញថាជម្លោះវាងអាម៉េរិក-អ៊ីស្រាអែល ជាមួយនឹងអ៊ីរ៉ង់​នឹងជិះឥទ្ធិពលមកលើភូមិសាស្រ្តនយោបាយ និងសេដ្ឋកិច្ចរបស់កម្ពុជា។ ប៉ុន្តែអ្វីដែលលោក​ព្រួយ​បារម្ភបំផុតនោះ គឺជម្លោះនេះ អាចធ្វើឱ្យប្រទេស​មហាអំណាចលែងសូវចាប់អារម្មណ៍លើការដោះស្រាយវិវាទព្រំដែនរវាងកម្ពុជា-ថៃ។

លោកបណ្ឌិតបន្តថា «អ្វីដែលយើងបារម្ភមែនទែន ដោយសារតែសហគមន៍​អន្តរជាតិផ្ដោតការយកចិត្ត​ទុកដាក់ទៅលើតំបន់មជ្ឈិម​បូព៌ា។ ប្រហែលគេ​ភ្លេចយកចិត្តទុកដាក់ នឹងផ្ដល់សារសំខាន់លើភាពរងគ្រោះ​នៃកម្ពុជា​យើង»។

ច្រកសមុទ្រ Hormuz គឺជាច្រកនាំចេញប្រេងដ៏សំខាន់ ឬស្មើនឹងប្រហែល ២០ភាគរយ នៃប្រេងដែលផ្គត់ផ្គង់លើពិភពលោក។ បើតាមការប៉ានស្មានរបស់អ្នកជំនាញសេដ្ឋកិច្ច ការអូសបន្លាយជម្លោះ​នៅអ៊ីរ៉ង់ អាចនឹងធ្វើឱ្យតម្លៃប្រេងអាចបន្តហក់ឡើងចន្លោះពី ១០០ដុល្លារ​ក្នុងមួយបារ៉ែល រហូតដល់ ១៥០ដុល្លារ ក្នុងមួយបារ៉ែល៕
ដោយ៖ខន ណារី