ភ្នំពេញ៖កម្លាំងចម្រុះនៃគណៈបញ្ជាការឯកភាពរាជធានីភ្នំពេញបាន​បង្ក្រាបទីតាំងសង្ស័យឆរបោកតាមបច្ចេកវិទ្យា(online scam)​ក្រោម​រូបភាពទាក់ទាញអតិថិជនឱ្យលេងល្បែងអនឡាញចំនួនពីរករណីផ្សេងគ្នាដែលមួយកន្លែងនៅភូមិសាស្រ្ត​ខណ្ឌ​សែនសុខ និងមួយកន្លែងទៀតនៅ​ខណ្ឌ​ឫស្សីកែវ ដោយឃាត់ខ្លួនជនជាតិ កូរ៉េខាងត្បូងសរុបចំនួន១០នាក់។

ប្រភពលេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោក តាមប្រព័ន្ធបច្ចេកវិទ្យា (គ.ប.ឆ.ប.)បានបញ្ជាក់ថា ក្នុងចំណោមជនជាតិ​កូរ៉េខាងត្បូង ទាំង១០នាក់នេះ ចំនួន៥នាក់ ត្រូវបានឃាត់ខ្លួនកាលពីថ្ងៃ​ទី៣ ខែមីនា ឆ្នាំ២០២៦ នៅបុរីវិមាន​ភ្នំពេញ ផ្ទះលេខ111R ផ្លូវ372 ភូមិ៤ សង្កាត់ ច្រាំងចំរេះ១ ខណ្ឌឫស្សីកែវ និងកាលពីថ្ងៃទី២ ខែមីនា ចំនួន៥នាក់​ទៀត ផ្សេងទៀត ត្រូវបានឃាត់ខ្លួន នៅបុរីពិភពថ្មី ផ្ទះលេខ ២៩ និង ៣១ ភូមិប៉ាយ៉ាប សង្កាត់ភ្នំពេញថ្មី ខណ្ឌសែនសុខ។ពួកគេ គឺជាក្រុមតែមួយ។

ប្រភពដដែលបន្តថា ការបង្ក្រាបទាំងពីរករណីនេះ សមត្ថកិច្ចបានដកហូត​វត្ថុតាងរួមមាន ថវិកាចំនួន ១៩,៧០០ ដុល្លារអាម៉េរិក, ធុង CPU ចំនួន៨​គ្រឿង, ម៉ូនីទ័រ ចំនួន១៨គ្រឿង, កុំព្យូទ័រយួរដៃចំនួន៣គ្រឿង, ទូរសព្ទដៃ ចំនួន៤គ្រឿង និងលិខិតឆ្លងដែន ចំនួន៦ច្បាប់។

តាមការសន្និដ្ឋានបឋមដោយផ្អែកលើរបាយការណ៍របស់សមត្ថកិច្ចជំនាញ ក្រុមជនសង្ស័យបានបង្កើត គេហទំព័រ(Website) ដើម្បី​បម្រើឱ្យ​សកម្មភាពល្បែងស៊ីសង អនឡាញ ដែលជាទង្វើខុសច្បាប់ និងប្រើប្រាស់​ទីតាំងក្នុងប្រទេសកម្ពុជា សម្រាប់ការ​ប្រព្រឹត្ត​សកម្មល្បែងស៊ីសងអន​ឡាញ​ខុសច្បាប់នេះ ក្នុងទិសដៅទៅប្រទេសកូរ៉េខាងត្បូង និងប្រទេសផ្សេងៗ។

ក្នុងចំណោមជនសង្ស័យទាំង១០នាក់នោះ ឈ្មោះ គីម ចាងហាន់(Kim Changhan) ជាមេខ្លោង ហើយមានដីកា ចាប់ខ្លួនពីបទ​ប្រតិបត្តិវេបសាយ​ល្បែងស៊ីសងខុសច្បាប់ ត្រូវបាន ស្ថានកុងសុល និងអនុព័ន្ធប៉ូលីសកូរ៉េខាង​ត្បូង ស្នើសុំមកអគ្គស្នងការដ្ឋាន​នគរបាលជាតិ តាមរយៈស្នងការដ្ឋាន​នគរ​បាល រាជធានីភ្នំពេញ ក្នុងការបញ្ជូនជនសង្ស័យទាំងនេះចេញពីប្រទេស​កម្ពុជា ដើម្បីបន្ត​នីតិវិធីផ្លូវច្បាប់ នៅប្រទេសដើមរបស់ពួកគេវិញ។

គួររំលឹកដែរថា ក្នុងប្រតិបត្តិការបង្ក្រាប online scamករណីផ្សេងទៀត កាលពីថ្ងៃទី១ខែមីនា ឆ្នាំ២០២៦ ជនសង្ស័យចំនួន​២៤​នាក់ត្រូវបាន​សមត្ថកិច្ច​ឃាត់ខ្លួន ពាក់ព័ន្ធនឹងការឆបោកតាមប្រព័ន្ធបច្ចេកវិទ្យា ក្នុងភូមិសាស្ត្រខណ្ឌចំការមន ក្នុងនោះជនជាតិចិន ៦នាក់ឃាត់ខ្លួនពី អគារThe peak tower២, ឥណ្ឌូណេស៊ី ៦នាក់ ពីអគារ The bridge និងជនជាតិឥណ្ឌូណេស៊ី ចំនួន១២នាក់ ពីអគារ Noden hotel and apartment ។បច្ចុប្បន្ន សមត្ថកិច្ចកំពុងបន្តនីតិវិធីចំពោះករណីទាំងនេះ ដោយអនុវត្តតាមច្បាប់ ជាធរមានរបស់កម្ពុជា។

គួរបញ្ជាក់ថា ក្នុងឱកាសអញ្ជើញជាអធិបតីភាពដ៏ខ្ពង់ខ្ពស់បើកកិច្ចប្រជុំ​កំពូល​ធុរកិច្ចអាស៊ាន-កម្ពុជាឆ្នាំ២០២៦ កាលពីព្រឹកថ្ងៃទី ៤ ខែមីនា ឆ្នាំ២០២៦នេះ សម្ដេចធិបតី ហ៊ុន ម៉ាណែតនាយករដ្ឋមន្ត្រីកម្ពុជា បានបញ្ជាក់ថា កម្ពុជាបានប្ដេជ្ញាចិត្តបោសសម្អាត​ឱ្យអស់នូវបទល្មើស​ឆបោកតាមប្រព័ន្ធបច្ចេកវិទ្យាចេញពីកម្ពុជានៅត្រឹមខែមេសាឆ្នាំ២០២៦ខាងមុខនេះ ដើម្បីបង្កើនបរិយាកាស​វិនិយោគល្អប្រសើរដល់វិនិយោគិន។កម្ពុជាមិនមែនជាកន្លែងសម្រាប់ឧក្រិដ្ឋជន បច្ចេកវិទ្យាប្រើប្រាស់ក្នុងការ​ប្រព្រឹត្តការឆបោក ឬបទល្មើសឆ្លងដែនឡើយ។ រាល់បុគ្គល ឬអង្គភាពទាំង​ឡាយ​ណាដែលនៅពីក្រោយសកម្មភាព ឆបោកទាំងនេះ នឹងត្រូវ​ប្រឈម​មុខនឹងទោសទណ្ឌខ្ពស់បំផុតដោយ គ្មានការយោគយល់ ឬការអន្តរាគមន៍​ណា​មួយឡើយ ៕

ដោយ៖ង៉ាន ទិត្យ