ក្នុងពិធីអបអរសាទរទិវាអន្តរជាតិនារី ដែលបានរៀបចំឡើងនៅទីស្ដីការក្រសួង នាព្រឹកថ្ងៃទី៦ ខែមីនា ឆ្នាំ២០២៦ ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានកោតសរសើរ និងវាយតម្លៃខ្ពស់ចំពោះនារីខ្មែរ ដែលបានចូលរួមយ៉ាងសកម្មលើគ្រប់ទិដ្ឋភាព នៅក្នុងការងារអភិវឌ្ឍន៍សង្គមជាតិ។

ជាងនេះទៅទៀត ស្រ្តីខ្មែរបានបង្ហាញលក្ខណៈសម្បត្តិ គុណសម្បត្តិ និងចរិយាសម្បត្តិល្អប្រពៃ មានភាពវាងវៃ ចេះបត់បែនតាមការវិវត្តនៃសង្គម សេដ្ឋកិច្ច និងវប្បធម៌ ហើយអាចចូលរួមគ្រប់កោសិកានៃសង្គម។ ក្នុងន័យនេះ
ឯកឧត្តមឧបនាយករដ្ឋមន្ត្រី បានលើកសរសើរគុណសម្បត្តិដ៏វិសេសវិសាលរបស់ស្រ្តី ក្នុងការកសាងសុភមង្គល ភាពកក់ក្តៅ និងភាពរុងរឿងនៅក្នុងគ្រួសារ ក្នុងនាមស្រ្តីជាមេផ្ទះ។

ឯកឧត្តមយល់ឃើញថា គុណសម្បត្តិទាំងអស់នេះ គឺជាមូលដ្ឋានគ្រឹះនៃការរីកចម្រើនរបស់សង្គមជាតិ ដែលយើងទាំងអស់គ្នាគួរចូលរួមអបអរសាទរជារៀងរាល់ថ្ងៃ មិនមែនត្រឹមតែនៅទិវាសិទ្ធិនារីមួយថ្ងៃប៉ុណ្ណោះទេ។ នៅក្នុងសង្គមកម្ពុជា ស្ត្រីត្រូវបានលើកតម្កើង និងមានគុណតម្លៃពិសេសផ្ទាល់ខ្លួនស្របតាមកត្តាសត្យានុម័ត ដែលបុរសមិនអាចធ្វើបាន។

ឯកឧត្តម សាយ សំអាល់ ក៏បានបញ្ជាក់ផងដែរថា នៅក្នុងវិស័យសំណង់ មានស្ត្រីដែលមានឯកទេសខាងវិស្វកម្ម និងស្ថាបត្យកម្មជាច្រើន បានចូលរួមក្នុងកិច្ចការអភិវឌ្ឍជាតិ។

ឯកឧត្តមបានលើកទឹកចិត្តដល់ថ្នាក់ដឹកនាំ និងមន្ត្រីរាជការទាំងអស់នៃក្រសួងរៀបចំដែនដី ត្រូវបន្តបង្កើនសមត្ថភាពរបស់ខ្លួន រក្សាលំនឹង និងភាពច្បាស់លាស់ ដើម្បីបំពេញការងារ និងចូលរួមកសាង ដឹកនាំប្រព័ន្ធការងារនៅក្រសួងរៀបចំដែនដី នគរូបនីយកម្ម និងសំណង់ ឱ្យដំណើរការល្អ។

ឯកឧត្តមឧបនាយករដ្ឋមន្ត្រី បានសង្កត់ធ្ងន់លើការងាររៀបចំដែនដីឲ្យបានត្រឹមត្រូវ ដើម្បីធានាអាយុជីវិតជាតិ ក្នុងរយៈពេលយូរអង្វែង, ក៏ដូចជាការរៀបចំនគរូបនីយកម្មឱ្យបានល្អ ដើម្បីប្រែក្លាយទីក្រុងឱ្យមានរចនាសម្ព័ន្ធល្អស្អាត ប្រកបដោយនិរន្តរភាព និងជួយឲ្យប្រជាពលរដ្ឋមានជីវភាពល្អប្រសើរ។

ចំពោះកិច្ចការសម្បទានដី គឺត្រូវធ្វើឲ្យលើសពីការងារចែកដីចែកផ្ទះ ដោយត្រូវធ្វើយ៉ាងណាឱ្យអ្នកទទួលផលមានជីវិតរស់នៅល្អប្រសើរ ហើយត្រូវតាមឱ្យទាន់ការវិវឌ្ឍន៍នៃសភាពការណ៍ និងស្វែងរកគំនិតថ្មីៗ ដើម្បីការអភិវឌ្ឍជាតិមាតុភូមិ៕