ភ្នំពេញ៖ដូងក្រអូបដែលមានផ្លែតូចល្មម និងមានរសជាតិឈ្ងុយឆ្ងាញ់ បានក្លាយជាទីពេញនិយមបរិភោគរបស់មនុស្ស​ទូទៅ​ពិសេសនៅរដូវក្តៅ។ អ្នកដាំដូង និងអ្នកលក់ដូងប្រភេទនេះ អះអាងថា ដូងក្រអូបកំពុងមានទីផ្សារល្អ បើទោះបី​កន្លងទៅ​បានធ្លាក់​ថ្លៃបន្តិចក៏ដោយ។

អ្នករកស៊ីដូងក្រអូបបានអះអាងដោយអំណរថា ទីផ្សារដូងក្រអូបមិនថា នៅខេត្តកែប កំពត ភ្នំពេញ បាត់ដំបង និង​ខេត្ត​មួយចំនួនទៀត ចាប់ពីដើមឆ្នាំ២០២៦និងឈានចូលដើមខែមីនានេះ កំពុងមានតម្រូវការខ្ពស់។ស្របគ្នានេះកសិដ្ឋាន និងចំការ​មួយចំនួនទៀតផ្គត់ផ្គង់ស្ទើរមិនគ្រប់គ្រាន់។

លោក ផុន សម្បត្តិ អ្នកទិញដូងក្រអូបបោះដុំនៅប្រចាំខេត្តបាត់ដំបងបានឱ្យដឹងថា​ដូងក្រអូបកំពុងមានទីផ្សារ​ល្អចាប់ពី​ដើមឆ្នាំ រហូតមកដល់ជិតពាក់កណ្តាលខែមីនានេះ។ចំពោះតម្លៃទិញពីចំការក្នុងមួយផ្លែពី១.២០០ដល់១.៥០០រៀល។អ្នកទិញបន្តយកទៅ​​លក់រាយតាមផ្សារគឺមួយផ្លែពី២.៥០០រៀលដល់៤.០០០រៀលក្នុងមួយផ្លែ។

លោក សម្បត្តិ បញ្ជាក់ថា ដូងដែលលោកទិញភាគច្រើន លក់ក្នុងទីផ្សារខេត្តបាត់ដំបង និងខ្លះទៀតនាំទៅលក់នៅ​ខេត្តមួយចំនួន​ទៀតនៅកម្ពុជា។

ជាអ្នកជំនួញដូង លោក ផុន សម្បត្តិបានសរសើរ​ដូងក្រអូបកម្ពុជា ថា ប្រកបដោយគុណភាព មានរសជាតិផ្អែមឆ្ងាញ់​ បើ​ទោះផ្លែតូចបន្តិចពិតមែនតែបានក្លាយជាទីពេញនិយម។លោកថា ដូងប្រភេទនេះនៅកម្ពុជាមានទីផ្សារល្អពិសេស​ភ្ញៀវទេសចរ​បរទេសចូលចិត្តណាស់ដែរ។ក្នុងមួយខែៗលោក សម្បត្តិ អាចលក់ដូងចាប់ពី៣ពាន់ ទៅ៥ពាន់ផ្លែ ។លោកថា បច្ចុប្បន្នដូងក្រអូប​តាមចំការ និងកសិដ្ឋានដូងក្រអូបជាច្រើនផ្គត់ផ្គង់ស្ទើរមិនគ្រប់គ្រាន់ដោយសារកំណើនអ្នកបរិភោគ ពិសេស​ដូងក្នុងខែប្រាំង​ខ្សត់ថែមទៀត។

អ្នកទិញដូងមួយរូបផ្សេងទៀត លោក ភា រ៉ុង បានប្រាប់ថា​ដូងក្រអូបនៅខែប្រាំង​ខ្វះច្រើនដោយសារតែ​ជារដូវក្តៅដូង​មិនសូវ​មានទឹក។បច្ចុប្បន្នលោកទិញពីកសិដ្ឋានដាំដូងក្រអូប ក្នុងមួយផ្លែតម្លៃ១.២០០ដល់១.៥០០រៀល ។អ្នកលក់រាយតាមផ្លូវ និងភោជនីយដ្ឋានចាប់ពី៣.000ទៅ៤.000រៀលក្នុងមួយផ្លែ។លោក រ៉ុង គឺជាអ្នកទិញដូងក្រអូបដ៏ធំប្រចាំនៅខេត្តកំពត និង​ខេត្តកែប ។

ចំណែក លោក ជិន តារា អ្នកដាំដូងក្រអូប និងជាអ្នកជំនាញកសិកម្មមួយរូប សព្វថ្ងៃមានចំការដូងក្រអូបនៅខេត្តព្រះសីហនុបាន បញ្ជាក់ថា ដូងក្រអូបមានទីផ្សារល្អប្រសើរ។ដូងប្រភេទនេះមិនចេះខ្វះទីផ្សារទេ។លោកថា ដំណាំប្រភេទនេះពិបាកដាំ​ជាង​ដូង​ធម្មតាក៏ពិតមែន តែនៅពេលហុចផល យើងអាចទទួលបានចំណូលច្រើនគួរសមដែរ។

ទាក់ទងនឹងដូងក្រអូប លោក ចាន់ រិទ្ធិ ប្រធានមន្ទីរកសិកម្មរុក្ខាប្រមាញ់ និងនេសាទ ខេត្តកំពតបានប្រាប់ថា​ដូងនៅខេត្ត​កំពត​សម្បូរបែប ។មានទាំងដូងធម្មតា ដូងតុកកែ និងដូងក្រអូប។ដូងក្រអូបនៅខេត្តកំពតបើគិតពីចំនួន មានតិចតួចជាងដូងធម្មតា និងដូងតុកកែ ។លោកទទួលស្គាល់ថា ដូងក្រអូបមានទីផ្សារល្អ ។ពិសេសភ្ញៀ់វទេសចរចូលចិត្ត និងមួយចំនួន​ទៀតលក់ទៅកាន់​ទីផ្សារ​ភ្នំពេញ និងខេត្តដទៃទៀត។

លោកបន្តថា មន្ទីរកសិកម្មជំរុញឱ្យមានការដាំដូងប្រភេទនេះឱ្យបានច្រើន និងពិសេសតំបន់ដែលមានសក្តានុពលទេសចរណ៍ដើម្បី​លក់ដល់ភ្ញៀវទេសចរដែលជាប្រភពចំណូលមួយដ៏សំខាន់។

គួរជម្រាបថា ដូងក្រអូបមានលក្ខណៈពិសេសដោយដើមទាបឆាប់ផ្តល់ផលនៅអាយុប្រហែល៣ឆ្នាំ។ផ្លែរបស់វាច្រើនគ្រប់រដូវ និងមានរសជាតិទឹកផ្អែមឈ្ងុយឆ្ងាញ់។ វាជាដំណាំសេដ្ឋកិច្ចខ្ពស់ ងាយស្រួលថែទាំ មិនរើសដី ហើយមានអាយុកាលផ្តល់ផលវែង​ឆ្ងាយរហូតដល់ ៤០-៥០ ឆ្នាំ។នេះបើតាមអត្ថបទស្រាវជ្រាវរបស់មន្រ្តីជំនាញក្រសួងកសិកម្ម និងបរិស្ថាន៕

ដោយ៖ម៉ាដេប៉ូ