ភ្នំពេញ៖៖រោងចក្រកែច្នៃផ្លែស្វាយរបស់ក្រុមហ៊ុន Khun Da Sambath Co., Ltd. ដែលមានទីតាំងនៅជាប់ផ្លូវល្បឿនលឿន ចន្លោះ​គីឡូ ម៉ែត្រលេខ៧៣-៧៤ ក្នុងឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ត្រូវបានរកឃើញថា ដំណើរការដោយគ្មាន​ច្បាប់​ពាក់ព័ន្ធវិស័យបរិស្ថាន និងបានបង្ហូរកាកសំណល់រាវចេញក្រៅរោងចក្របង្កឱ្យប៉ះពាល់បរិស្ថាន និងជះក្លិន ស្អុយប៉ះពាល់​ដល់​ការរស់នៅរបស់ប្រជាពលរដ្ឋ។ភ្លាមៗនោះ មន្រ្តីជំនាញក្រសួងបរិស្ថានបានចាត់វិធានការចាំបាច់មួយចំនួនឱ្យម្ចាស់រោងចក្រ
មួយនេះបំពេញកាតព្វកិច្ច។

កាលពីថ្ងៃទី១៣ ខែមីនា ឆ្នាំ២០២៦ ក្រុមការងារអធិការកិច្ចនៃអគ្គនាយកដ្ឋានគាំពារ បរិស្ថាន ក្រសួងបរិសា្ថន បានចុះ​ទៅដល់ទីតាំងរោងចក្រកែច្នៃផ្លែស្វាយរបស់ក្រុមហ៊ុន Khun Da Sambath Co., Ltd. ដែលមានទីតាំងនៅជាប់​ផ្លូវល្បឿនលឿន ចន្លោះ​គីឡូម៉ែត្រលេខ៧៣-៧៤ ក្នុងឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។មន្រ្តីអធិការកិច្ចបានរកឃើញថា ក្រុមហ៊ុន​បាន​ប្រព្រឹត្តល្មើសទៅនឹង មាត្រា១៦១ មាត្រា១៧៣ មាត្រា៦៦៨ និងមាត្រ៨៤៥ នៃក្រមបរិស្ថាន និងធនធានធម្មជាតិ និងអនុក្រឹត្យ​លេខ៤២ និងអនុក្រឹត្យលេខ ១០៣ ស្ដីពីការត្រួតពិនិត្យការបំពុលទឹក។ 

ក្រោយការរកឃើញក្រសួងបរិស្ថានបានចាត់វិធានការចាំបាច់ចំនួន៦ចំណុច ក្នុងនេះ៖១. ក្រុមហ៊ុនត្រូវបញ្ឈប់​ការបញ្ចេញ​បង្ហូរ​សំណល់រាវចេញពីទីតាំងក្រុមហ៊ុនជាបន្ទាន់។ ២. ក្រុមហ៊ុននឹងទទួលរងនូវពិន័យអន្តរកាល។ ៣. ក្រុមហ៊ុនត្រូវផ្ដល់​សំណង​ការខូចខាតបរិស្ថាន និងត្រូវស្តារបរិស្ថានឡើងវិញនៅទីតាំង ដែលទទួលរងការបំពុល។ ៤. ក្រុមហ៊ុនត្រូវធ្វើអាង​ប្រព្រឹត្តិកម្ម​សំណល់រាវ សម្អាតឱ្យបានស្អាតមុនបង្ហូរចេញ ។៥.ក្រុមហ៊ុនត្រូវស្នើសុំច្បាប់ និងលិខិតអនុញ្ញាតពីក្រសួងបរិស្ថាន។ ៦. ត្រូវរៀបចំ​សម្អាតអនាម័យបរិស្ថាននៅក្នុងទីតាំងក្រុមហ៊ុនឱ្យបានល្អប្រសើរ ដូចជា ការរៀបចំទីតាំងទុកដាក់សំណល់​រឹងពីផលិតកម្ម​ឱ្យបានត្រឹមត្រូវ និងបែងចែកសំណល់ឱ្យដាច់ដោយឡែក។

សូមបញ្ជាក់តាមរយៈសេចក្តីរាយការណ៍របស់ប្រជាពលរដ្ឋរស់នៅក្រោយរោងចក្រចំងាយប្រហែល ៧០០ម៉ែត្រ បានប្រាប់ថា​មានក្លិនស្អុយចេញពីទីតាំងរោងចក្រកែច្នៃស្វាយព្រមទាំងទឹកសំអុយបង្ហូរពីទីតាំងរោងចក្រមកដល់ប្រឡាយមុខផ្ទះរបស់ពួកគាត់ ជាពិសេសនៅរដូវវស្សា៕
ដោយ៖ង៉ាន់ ទិត្យ