ភ្នំពេញ៖ ធុរកិច្ចថ្មីឌីជីថលឆ្នើមរបស់កម្ពុជា «CheckinMe» បានសាងសមិទ្ធផលដ៏ត្រចះត្រចង់មួយជូនជាតិ ដោយដណ្តើមបានជ័យលាភីកំពូលទាំង៣ (Top 3) លើឆាកអន្តរជាតិ ក្នុងកម្មវិធីសហគ្រិនវ័យក្មេងប្រចាំតំបន់អាស៊ីប៉ាស៊ីហ្វិក ដែលបានប្រព្រឹត្តទៅនៅទីក្រុងនីហ្គាតា (Niigata) ប្រទេសជប៉ុន កាលពីថ្ងៃទី១១ ខែមិថុនា ឆ្នាំ២០២៦ កន្លងទៅនេះ។

ជោគជ័យដ៏ធំធេងនេះ បានកើតឡើងនៅក្នុងព្រឹត្តិការណ៍ដ៏ធំ JCI ASPAC Niigata 2026 ហើយតាមរយៈលទ្ធផលដ៏គាប់ប្រសើរនេះ CheckinMe ក៏ត្រូវបានគណៈកម្មការជ្រើសរើសឱ្យបន្តទៅប្រកួតក្នុងវគ្គផ្តាច់ព្រ័ត្រថែមទៀតផង។ ជាមួយគ្នានេះ ក្រសួងប្រៃសណីយ៍និងទូរគមនាគមន៍ ក៏បានសម្តែងនូវការអបអរសាទរយ៉ាងស្មោះស្ម័គ្រចំពោះជោគជ័យដ៏ធំធេងរបស់ក្រុមការងារ CheckinMe ផងដែរ។

CheckinMe គឺជាសហគ្រាសបច្ចេកវិទ្យាបង្កើតឡើងដោយស្នាដៃកូនខ្មែរ ដែលផ្តល់នូវដំណោះស្រាយឌីជីថល (Digital Solution) យ៉ាងមានប្រសិទ្ធភាពខ្ពស់សម្រាប់ម្ចាស់អាជីវកម្ម។ ថ្នាលបច្ចេកវិទ្យានេះ ជួយជម្រុញដំណើរការការងារឱ្យកាន់តែមានភាពរហ័សរហួន តាមរយៈប្រព័ន្ធស្វ័យប្រវត្តិកម្ម (Automation) លើការងារសំខាន់ៗរួមមាន៖ការគ្រប់គ្រងវត្តមានរបស់បុគ្គលិក (Attendance Management) ការគណនា និងគ្រប់គ្រងប្រាក់បៀវត្ស (Payroll) ការតាមដាន និងគ្រប់គ្រងសកម្មភាពក្រុមការងារលក់ខាងក្រៅ (Field Sales Tracking)។

គួរបញ្ជាក់ផងដែរថា CheckinMe គឺជាធុរកិច្ចថ្មីឌីជីថលឈានមុខគេមួយ ដែលទទួលបានការគាំទ្រយ៉ាងពេញទំហឹងពីក្រសួងប្រៃសណីយ៍និងទូរគមនាគមន៍។ មុននឹងឈានជើងទៅដណ្តើមពានរង្វាន់លើឆាកអន្តរជាតិនេះ CheckinMe បានទទួលជោគជ័យយ៉ាងខ្លាំងលើទីផ្សារក្នុងស្រុក ដោយធ្លាប់បានឈ្នះ «ពានរង្វាន់រដ្ឋមន្ត្រីសម្រាប់ធុរកិច្ចថ្មីឌីជីថលឆ្នើមប្រចាំឆ្នាំ២០២២» នៅក្នុងកម្មវិធីពានរង្វាន់ឌីជីថលកម្ពុជា (Cambodia Digital Awards) ព្រមទាំងបានចូលរួមក្នុងកម្មវិធីពន្លឿនអាជីវកម្មលំដាប់សកលរបស់ក្រុមហ៊ុន Plug and Play ទៀតផង។

ស្នាដៃដ៏អស្ចារ្យរបស់ CheckinMe នៅប្រទេសជប៉ុននាពេលនេះ មិនត្រឹមតែបង្ហាញពីសមត្ថភាព និងគំនិតច្នៃប្រឌិតខ្ពស់របស់យុវជនកម្ពុជានៅលើឆាកអន្តរជាតិប៉ុណ្ណោះទេ ប៉ុន្តែថែមទាំងជាសក្ខីភាពបញ្ជាក់ពីការរីកចម្រើនយ៉ាងរហ័សនៃប្រព័ន្ធអេកូឡូស៊ីធុរកិច្ចថ្មីបច្ចេកវិទ្យា (Startup Ecosystem) នៅក្នុងប្រទេសកម្ពុជាផងដែរ៕

ដោយ៖ង៉ាន់ ទិត្យ