ភ្នំពេញ៖ អ្នកនាំពាក្យក្រសួងព័ត៌មាន ឯកឧត្តម ទេព អស្នារិទ្ធ បាន​ណែនាំដល់មន្រ្តីនៃមន្ទីរព័ត៌មានខេត្តកំពត ឱ្យរៀបចំផែនការ​គ្រប់គ្រង និងផលិតមាតិកាព័ត៌មានឱ្យមានភាពច្បាស់លាស់ និងប្រព័ន្ធការងារ​ល្អប្រសើរ ដើម្បីធានាការផ្សព្វផ្សាយព័ត៌មាន​បាន​ទាន់ពេលវេលា ឆ្លុះបញ្ចាំងពីសមិទ្ធផល និងវឌ្ឍនភាពនានារបស់ខេត្ត ព្រមទាំងឆ្លើយ​តប​ប្រកបដោយប្រសិទ្ធភាពចំពោះការងារ​សាធារណមតិ។

ការណែនាំនេះ បានធ្វើឡើងក្នុងកិច្ចប្រជុំតម្រង់ទិសការងារព័ត៌មាន និងសាធារណមតិ ដែលដឹកនាំដោយឯកឧត្តម ទេព អស្នារិទ្ធ និង​ឯកឧត្តម សោម កុសល អនុរដ្ឋលេខាធិការក្រសួងព័ត៌មាន ទទួល​បន្ទុកការងារមន្ទីរព័ត៌មានខេត្តកំពត ជាមួយថ្នាក់ដឹកនាំ និងមន្ត្រី​មន្ទីរព័ត៌មានខេត្តកំពត កាលពីចុងសប្ដាហ៍កន្លងទៅ

ក្នុងឱកាសដដែលនេះដែរ ឯកឧត្តម ទេព អស្នារិទ្ធ បានជំរុញឱ្យ​មន្ត្រីព័ត៌មានរៀបចំប្រតិទិនមាតិកាព័ត៌មាន ដោយផ្តោតលើ​សមិទ្ធផលរបស់រដ្ឋបាលខេត្ត ការអភិវឌ្ឍមូលដ្ឋាន សក្តានុពលវិស័យ​ទេសចរណ៍ និងសកម្មភាពដោះស្រាយបញ្ហាជូន​ប្រជាពលរដ្ឋ។

ជាមួយគ្នានេះ ឯកឧត្តមក៏បានលើកទឹកចិត្តឱ្យមន្ត្រីជំនាញបង្កើនការ​ផលិតវីដេអូខ្លីបែបទម្រង់បញ្ឈរ (Short-form Video) សម្រាប់​ផ្សព្វផ្សាយតាមបណ្តាញសង្គម ដូចជា TikTok, Facebook Reels និង YouTube Shorts ដោយផ្តោត​លើប្រសាសន៍​ដឹកនាំ សារសំខាន់ៗ​របស់អភិបាលខេត្ត និងសកម្មភាពនានារបស់​រដ្ឋបាល​ខេត្ត និងមន្ទីរ-អង្គភាពជំនាញ។

ឯកឧត្តមបានបញ្ជាក់ថា ការផ្សព្វផ្សាយព័ត៌មានបែបបុរេសកម្ម មិនត្រឹម​តែជួយឱ្យប្រជាពលរដ្ឋទទួលបានព័ត៌មានពិត និងគ្រប់ជ្រុង​ជ្រោយប៉ុណ្ណោះទេ ប៉ុន្តែថែមទាំងអាចទប់ស្កាត់ និងឆ្លើយតបទាន់​ពេលវេលាចំពោះព័ត៌មានក្លែងក្លាយ ឬការផ្សព្វផ្សាយដែលមាន​ចេតនា​​បង្កការយល់ច្រឡំលើការដឹកនាំរបស់រដ្ឋបាលខេត្តផងដែរ។

ដោយឡែក ឯកឧត្តម សោម កុសល បានលើកឡើងថា ការផលិត និងផ្សព្វផ្សាយព័ត៌មានឱ្យបានលឿន ត្រឹមត្រូវ និងគួរឱ្យទុកចិត្ត គឺជាកត្តាសំខាន់ក្នុងការបន្សាប និងលុបបំបាត់ព័ត៌មានមិនពិត។ ឯកឧត្តមបានសង្កត់ធ្ងន់ថា មន្ត្រីជំនាញមិនគួរទុកឱ្យព័ត៌មាន​អវិជ្ជមានកើតមានដោយគ្មានការឆ្លើយតបនោះឡើយ ព្រោះមានតែ​ព័ត៌មាន​ពិតប៉ុណ្ណោះ ដែលអាចប្រឆាំង និងបន្សាបព័ត៌មាន​ក្លែងក្លាយបានប្រកបដោយប្រសិទ្ធភាព។

ជាការឆ្លើយតប លោកស្រី ប៉ូ ចាន់រស្មី ប្រធានមន្ទីរព័ត៌មានខេត្តកំពត បានថ្លែងអំណរគុណដល់ថ្នាក់ដឹកនាំក្រសួងព័ត៌មាន ដែលបានផ្តល់​ការណែនាំ និងតម្រង់ទិសការងារយ៉ាងច្បាស់លាស់។ លោកស្រីបាន​ប្តេជ្ញាថា នឹងដឹកនាំមន្ត្រីក្រោម​ឱវាទអនុវត្ត​ផែនការការងារឱ្យ​​ទទួល​បានជោគជ័យ ដើម្បីបម្រើប្រយោជន៍សាធារណៈ និងបំពេញតួនាទី​ជាសេនាធិការជូនរដ្ឋបាលខេត្ត និងក្រសួងព័ត៌មានប្រកបដោយ​ប្រសិទ្ធភាព៕
ដោយ៖ង៉ាន ទិត្យ