ស្ទឹងត្រែង៖ កម្លាំងកងរាជអាវុធហត្ថខេត្តស្ទឹងត្រែង សហការជាមួយមន្ទីរបរិស្ថានខេត្ត បានបើកប្រតិបត្តិការស្ទាក់ចាប់ការដឹកជញ្ជូនគ្រឿងញៀនឆ្លងដែនទ្រង់ទ្រាយធំមួយ នៅចំណុចកន្ទុយកោះហឹប ភូមិកោះហឹប ឃុំអូស្វាយ ស្រុកបុរីអូស្វាយសែនជ័យ ខេត្តស្ទឹងត្រែង។

ប្រតិបត្តិការនេះធ្វើឡើងនៅវេលាម៉ោង ជាង៩យប់ ថ្ងៃទី៣០ ខែមិថុនា ឆ្នាំ២០២៦ ក្រោមការបញ្ជាផ្ទាល់ពីលោកឧត្តមសេនីយ៍ត្រី សេង សុភាព មេបញ្ជាការកងរាជអាវុធហត្ថខេត្តស្ទឹងត្រែង។ បើទោះបីជាជនសង្ស័យបានដឹងខ្លួន និងរត់គេចខ្លួនបាត់ក៏ដោយ ប៉ុន្តែសមត្ថកិច្ចបានរឹបអូសវត្ថុតាងជាគ្រឿងញៀនបានយ៉ាងច្រើន។

នៅព្រឹកថ្ងៃទី០១ ខែកក្កដា ឆ្នាំ២០២៦ ក្រោមវត្តមានឯកឧត្តម សរ សុពុត្រា អភិបាលខេត្តស្ទឹងត្រែង និងតំណាងអយ្យការអមសាលាដំបូងខេត្ត សមត្ថកិច្ចបានធ្វើការថ្លឹងវត្ថុតាងជាផ្លូវការមាន ប្រភេទគ្រឿងញៀន៖ មេតំហ្វេតាមីន (ICE/ម៉ាទឹកកក)ចំនួន៖ ៣៧ កញ្ចប់ធំ។ទម្ងន់សរុប៖ ៣៧,៧១១.៧ ក្រាម (ប្រហែលជិត ៣៨ គីឡូក្រាម)។

បច្ចុប្បន្ន វត្ថុតាងទាំងអស់ត្រូវបានរក្សាទុកជាបណ្តោះអាសន្ននៅបញ្ជាការដ្ឋានកងរាជអាវុធហត្ថខេត្ត។ ការិយាល័យប្រឆាំងគ្រឿងញៀនកំពុងកសាងសំណុំរឿងតាមនីតិវិធីច្បាប់ និងបន្តប្រមាញ់ស្វែងរកជនសង្ស័យដែលរត់គេចខ្លួន ដើម្បីយកមកផ្ដន្ទាទោសតាមច្បាប់ជាធរមាន៕
ដោយ៖ឡុង សំបូរ